Maite Ruiz de Erentxun soinujole eta konpositore bizkaitarra hautatu dute Jolazz egoitza artistikoaren lehen edizioan parte hartzeko. Egonaldi honi esker, sormen prozesu bat garatuko du Bartzelonako Taller de Músics-en ekainaren 29tik uztailaren 3ra. Taller dd Músics-eko ikasleekin batera sortuko duen proiektua uztailaren 3an aurkeztuko da zuzenean La Pedrerako (Bartzelona) Talents Jazz Jaialdian. Hautaketa Taller de Músics-ek burutu du. Musika Bulegoa eta Taller de Músics-en arteko lankidetzak Euskal Herriaren eta Kataluniaren arteko lotura musikalak indartzen jarraitzen du ekimen honen bidez. Sormen egonaldi honen helburu nagusia bi lurraldeetako jazz musikarien arteko trukea eta lotura sustatzea da. Proiektuak honako fasea hauek izango ditu, guztiak Bartzelonan: - Ekainaren 11 eta 12an, Maite Ruiz de Erentxunek entzunaldi bat egingo du Taller de Músics-eko ikasleen artean. - Ekainaren 29tik uztailaren 3ra arte egonaldi artistikoa izango da, eta bertan musikariek sormen prozesu bat garatuko dute elkarrekin. - Uztailaren 3an emaitza aurkeztuko da zuzenean La Pedrera Talents Jazz jaialdian (Bartzelona).   Maite Ruiz de Erentxun Lekeition jaioa, Maite Ruiz de Erentxunek eskusoinua darama ariman. Bere ibilbide musikala euskal musika tradizionalarekin hasten da, musika klasikoaren teknikarekin eratzen da eta jazzean bere adierazpen-espazioa aurkitzen du. Jatorrizko konposizioen lehen diskoan, mundu horiek topo egiten dute eta elkarrekin hitz egiten dute, ñabarduraz betetako soinu-unibertso bati forma emanez. Gaur egun, konposizioan sakontzen jarraitzen du, soinu-banda bat sortzen eta ensemble handiko lan berri bat bezalako proiektuekin. Eskusoinua esploratu gabeko lurraldeetara eraman nahi izan du beti, hainbat artista eta talderekin lankidetzan: Maria Schneiderren Big Band, Pedro Memelsdorffen antzinako musika orkestra Théotime Langlois de Swarterekin, Roba Estesa musika tradizionaleko taldea, Old Fashion Swing Company, dantza, ahotsa eta akordeoia uztartzen dituena, baina baita proiektu ezagunagoetan ere, hala nola La Maravillosa Orquesta del Alcohol (La M.O.D.A), Sedientos de Cumbia, La  edo Killing Pizarro taldeekin lankidetzan. Proiektu berri honekin, Maitek aro berri bati ekingo dio bere ibilbidean, konpositore gisa zuen ahots artistikoa berretsiz eta soinu berriak arakatuz eskusoinutik.