Datorren irailaren 30ean eta urriaren 1ean Tabakaleran (Donostia) Must +Pro Euskal Herriko musika sektoreari zuzendutako topagune profesional berriaren lehen edizioa egingo da. Musika Bulegoak antolatu du, Eusko Jaurlaritzaren eta Gipuzkoako Foru Aldundiaren laguntzarekin, eta Kutxa Fundazioaren, Tabakaleraren eta EiTB-Gaztearen lankidetzarekin. Musika-ekosistemaren esparru guztietako profesionalentzako urteroko topagune gisa sendotzeko asmoarekin sortu da ekitaldi hau.
Must +Pro-k sektorearen hazkunderako katalizatzailea izan nahi du, esperientzien trukearen, ikasketa kolektiboaren eta sareen sorreraren bidez. Bi egunetan zehar, ekitaldiak egitarau zabala eskainiko du: hitzaldiak, mahai-inguruak, aurkezpenak, zuzeneko podcastak eta showcaseak, hausnarketa, prestakuntza eta ikuspen artistikoa uztartuz.
Programazioak gaur egun musikak bizi dituen erronka eta eraldaketa nagusietako batzuk jorratuko ditu. Landuko diren gaien artean, hauek nabarmentzen dira: adimen artifizialak musikaren sorkuntzan, hedapenean eta kontsumoan duen eragina; proiektuak nazioartekotzeko estrategiak; jabetza intelektuala eta eskubideen kudeaketa; management-ak ingurune digital eta global batean duen rol berria; musikari aplikagarri zaizkion pizgarri fiskalak; sortzen ari diren publikoekiko harremana; profesionalen osasun mentala eta ongizatea; eta artistentzako komunikazio- eta marka-estrategien garapena.
Gainera, programak lau mahai-inguru izango ditu, Musikari, Musikagileak, Kultura Live eta MIE elkarteekin elkarlanean antolatuak, sektorearen erronka nagusiei buruzko ikuspegiak emango dituztenak.
Egun bakoitzari amaiera emateko, bi podcast egongo dira zuzenean Gaztearekin lankidetzan, Euskal Herriko musika panoramako artista gonbidatuekin. Zuzeneko musikarako tartea ere egongo da: Kutxa Fundazioa Klubak 10 showcase hartuko ditu (eguneko 5), epaimahai profesional batek aukeratuak deialdi irekian jasotako 61 proposamenetatik abiatuta.
Programa profesionala 9: 30etatik 17:00etara izango da Tabakaleran, eta showcaseak 17:30etatik 21:30etara izango dira Kutxa Fundazioa Kluban.
Sarrerak irailaren hasieran egongo dira eskuragarri, Musika Bulegoko bazkideentzako prezio bereziekin. Bi eguneko sarrerak 50 €-ko prezioa izango du eta 30 € bazkideentzat. Egun bakarreko sarrerak 30 € balioko du eta 20 € bazkideentzat. Sarrera horiek programa profesionalerako sarbidea eta showcase-etarako lehentasuna emango dute.
Euskal Herriko musika sektoreko programatzaile eta eragile garrantzitsuenetako batzuek parte hartuko dutela baieztatu dute dagoeneko. Fokua tokiko testuinguruan egongo den arren, Must +Pro-k lurraldetik kanpoko profesionalak eta erreferenteak ere izango ditu.
Datozen asteetan programa osoa ezagutzera emango da eta sarreren salmenta irekiko da. Bitartean, datak gorde!